Морт-туган йорт

Исемен эйтеп дога кылыгыз

Кадрия — Tue, 22 Jan 2019 08:20:06 GMT

Сайтның "шәҗәрә бәйрәме" бүлегендә авылда яшәгән әби-бабаларыбыз исемлеге бар. Бик кызыклы, матур-матур исемнәр. Кереп карагыз әле, бәлки туачак балаларыгыз исемендә яңартып җибәрерсез. Менә мин бүген соңгы 1897 нче елның исемлеген урнаштырдым. Аллаһка шөкер, мин бу исемлекне дә язып бетердем. Әгәр Сез нәсел тамырларыгызны барлап кем икәнегезне ачыклый алсагыз, минем хезмәтем бушка китмәс иде. Мин бик тә саваплы булыр идем. Киңәшем шул бу документны рус кешесе тутырган, димәк ничек ишеткән шулай язган. Хаталар булырга мөмкин. Эзләнегез , соң булса да ерак әби-бабаларыгызның исемнәрен әйтеп дога кылыгыз. Урыныгыз җәннәтләрдә булыр.

Чишмә бәйрәмгә чакыра.

Кадрия — Sat, 09 Apr 2016 18:54:43 GMT

Балавыз чишмәсе Морт авылы кешеләренең бик яраткан урынына әйләнеп бара. Анда яшьләр очраша, кич һава суларга чыгучыларны да сукмак шунда илтә. Менә Чишмә барыбызны да бәйрәмгә чакыра

Ватаным Татарстанга язалар

Кадрия — Wed, 06 Apr 2016 19:28:27 GMT

Ни генә көтәләрдер?

Әгерҗе районы, Яңа Аккүз авылыннан Илсур Хикмәтовның хатындагы фикерләргә мин дә бик теләп кушылам. Россиянең унҗиде төбәгендә безнең шикелле әтиләре сугышта һәлак булган сугыш чоры балаларына (без инде хәзер 70тән узган әбиләр һәм бабайлар) матди ярдәм күрсәтелә икән. Ә Татарстанда Бөек Ватан сугышында Җиңүнең 70 еллыгын бәйрәм иткәндә безне, сугыш чоры балаларын, җылы сүз белән дә искә алмадылар. Сугышта һәлак булып калган әтиләребез өчен дәүләт биргән пособиенең безгә бер генә тиене дә сарыф ителмәде дисәм дә, ялгыш булмас. Чөнки бу пособие ул вакыттагы түләүләргә, салымнарга китте.Сугыш ветераннарына булышабыз дип һаман язалар, сөйлиләр. Безнең шундый зур Морт авылында бер ветеран исән. Ул да инде 90 яшендә. Әтием фронтка киткәндә мин 7 айлык бала булып калганмын, хәзер инде миңа 75 яшь. Газ өчен, электр өчен тарифларны гел арттырып торалар, ә пенсияләрне арттырганда бик аз гына өстиләр. Йә газ, йә электр, йә телефон түләүләренә ташламалар ясап, яртысын гына түли торган итсәләр дә, бик зур ярдәм булыр иде. Әтиләре сугышта һәлак булып калган иптәшләребезнең күбесе бакыйлыкка да күчте инде. Калганнарыбызның да үлеп беткәнен көтә торганнардыр, күрәсең.

Рауза Рафикова.

Алабуга районы,Морт авылы

(“Ватаным Татарстан”, /№ 13, 30.01.2016/)

Мария апа Любимовага 90 яшь.

Кадрия — Wed, 06 Apr 2016 19:24:02 GMT

Морт авылында яшәүче Мария әби Любимованың шатлыклы мәшәкатьләр белән яшәп яткан көне – шушы көннәрдә аңа 90 яшь тулды. Котларга, һәрваыкттагыча, туганнар, күршеләр һәм район җитәкчелеге килде

Үзе дә бик уңай фикерле, кешеләргә карата да позитив карашта торучы Мария әбине Морт авылында хөрмәт итмәгән кеше юктыр. Катлаулы һәм озын гомер кичергән Мария түти. Шул чор кешеләренә хас булганча, авыр хезмәт, сугыш еллары, сугыштан соңгы ачлык, җитмәүчелек – алар турында ул сагынып та, сагышланып та сөйли. Мария Ивановна Алабуга районының Айталан авылында туып-үскән. Ул мәктәптә укымый, төрле хезмәт башкаручы булып колхозда эшли башлый. Бөек Ватан сугышы барганда Марияне Лубян бистәсенә утын әзерләргә җибәрәләр. 1948 елда Мортка күченеп килгән һәм шушы көнгә тикле ул биредә гомер итә. Ананың өч кызы, гаиләләре белән әниләренә кунакка килеп, аның хәлен белеп тора, ә әни янында булу кайчакта бер-ике атнага, кайвакыт берәр айга да сузыла. Мария Ивановна тормышны яратуы, уңай тойгылар бүләк итә белүе белән аерылып тора, аның бу матур сыйфатлары барлык туганнарына, якыннарына һәм хәтта юбилярның күршеләренә дә күчә.

Гомер бәйрәме – 90 яшьлек юбилее белән Мария Ивановнаны район башкарма комитеты җитәкчесенең беренче урынбасары Лилиана Бикметова, Алабуга муниципаль районы Советының оештыру бүлеге җитәкчесе Гүзәл Таҗиева һәм Морт авыл җирлеге башлыгы Фәиз Закиров тәбрик итте. Традиция буенча тугыз дистәне тутыручы әбекәйгә Россия Президенты Владимир Путиннан котлау хаты, ә район башлыгы Геннадий Емельяновтан рәхмәт сүзләре язылган открытка, чәчәк бәйләме һәм җылы юрган тапшырылды.

Авылыбызның иң өлкән кешесе.

Кадрия — Wed, 17 Feb 2016 18:58:36 GMT

Нургалиева Сөембикә Фәйзрахман кызына 95 яшь.

ТНВ Мортта кунакта.

Кадрия — Wed, 17 Feb 2016 18:30:50 GMT

Мортта Татарстан Яңа Гасыр телерадиокомпаниясе кунакта булып китте. Алар авылыбызны дөнья татарларына таныту максаты белән килгәннәр. Мең рәхмәт аларга. Бу программа безне 17 февральдән күрсәтә башлый. Татарлар проекты сәгать 20 сәг. 30 минутта башлана. Рәхим итеп карагыз!

Сайтның яңа дизайны.

Кадрия — Mon, 01 Feb 2016 16:25:01 GMT

Хөрмәтле сайтыбыз кунаклары, авылдашлар!

Бүгеннән сайтыбыз яңа төрдә эшли башлый. Ул бик уңайлы,яңача,яшьләрчә. Алга таба сайтыбызның техник инженеры минем укучым, мәктәбебезнең 2013 нче чыгарылыш укучысы Хуҗин Нурсил. Рәхим итегез!

Хөрмәтле авылдашлар, авылыбыз кунаклары!

Кадрия — Thu, 13 Nov 2014 07:49:13 GMT

Сез Алабуга районы Морт авылы сайтына кердегез.

Сезне күрүебезгә чиксез шатбыз!

Биредә сез авылыбызның үткәне ,бүгенгесе, ирешкән уңышлары белән танышырсыз. Авылыбызны тагын да күркәм,яшәргә уңайлы итү өчен нәрсәләр эшләргә икәнен бергәләп хәл итәрбез,хыял диңгезләренә чумарбыз.

Бергә булыйк,бердәм булыйк дусларым!

Сайтыбыз авылдашларның очрашу урыны булсын иде.

Авылдашлар сайты әле беренче адымнарын ясый,ул һәммәбезне канәгатьләндерсен дисәк әби-бабаларыгызның,әти-әниләрегезнең,үзегезнең истәлекләрегезне,иҗат җимешләрегезне минем электрон почтага юллагыз. Мин аларны бик рәхәтләнеп сайтыбызга урнаштырырмын.